Aron masiguro ang limpyo ug patas nga eleksyon karong 2025, gibuksan na sa Police Regional Office 7 (PRO7) ang mga Kontra Bigay Complaint Desks sa 121 ka police stations sa Central Visayas sugod Marso 7, 2025.
Kini nga lakang nagsunod sa mando sa Chief PNP aron palig-onon ang kampanya batok sa vote-buying ug vote-selling, nga iligal ubos sa Batas Pambansa Blg. 881, Seksyon 261(a).
Ang vote-buying mao ang pagpanghatag o pagsaad og kwarta, trabaho, o bisan unsang pabor aron mapaboran ang usa ka kandidato. Ang vote-selling mao ang pagdawat o pagpangayo og bayad o saad bugti sa ilang boto.
Ang mga makalapas niini mag-atubang og silot nga pagkapriso sulod sa usa hangtod unom ka tuig (walay probation), diskwalipikasyon sa pagserbisyo sa gobyerno, ug pagkawala sa katungod sa pagboto. Para sa mga langyaw, posible usab ang deportation.
Gi-awhag sa PRO7 ug COMELEC ang publiko nga mosumbong sa bisan unsang kaso sa vote-buying o vote-selling, ug mopili og kandidato nga matinud-anon ug mag-alagad sa katawhan.
Matud pa ni PRO7 Regional Director PBGEN Redrico A. Maranan, nga kini nga mga complaint desks simbolo sa ilang walay puas nga paningkamot nga magpabilin nga limpyo ug malinawon ang eleksyon 2025.
Bukas ang tanang Kontra Bigay Complaint Desks sa mga kapolisan sa Central Visayas para sa mga reklamo. Ang PRO7 nagpabilin nga kasaligan ug neutral nga pwersa alang sa demokrasya.
Source: PRO7- PIO
I via Renante Socia Lada