Nadakpan sa kapolisan sa Naga City ang usa ka Top 10 Municipal Most Wanted Person atol sa operasyon nga gihimo sa Purok Bamboo, Barangay Inayagan, Naga City, Cebu niadtong nakalabay nga adlaw. Ang pagdakop gibase sa warrant of arrest nga gipagawas sa korte.
Ang suspek nag-atubang og kaso sa paglapas sa Section 10(a) sa Republic Act 7610 o balaod nga nagpanalipod sa mga bata batok sa abuso, pagpahimulos ug diskriminasyon. Gitakda sa korte ang piyansa nga ₱80,000 alang sa iyang temporaryong kagawasan.
Base sa imbestigasyon, giingong giabuso sa suspek ang usa ka menor de edad sa Barangay Cogon, Naga City. Human mapasakaan og kaso ug mapadalhan og subpoena, nagtago matod pa siya aron makalikay sa pagdakop.
Sa pagkadakop, gipahibalo ang suspek sa iyang mga katungod ug karon anaa na sa kustodiya sa Naga City Police Station samtang gihulat ang iyang pagbalhin ngadto sa korte.
Sumala sa Cebu Police Provincial Office, ipadayon nila ang kampanya batok sa mga wanted person ug gihangyo usab ang publiko nga magtinabangay pinaagi sa paghatag og tukmang impormasyon aron mas dali madakpan ang mga naglikay sa balaod.
I via Renante Socia Lada