Nadakpan ang usa ka 64-anyos nga lalaki sa Purok Sambag, Barangay Candulawan, Talisay City, sayong buntag karong Hulyo 12, 2026, human giingong nanghulga og armas sa mga tawo nga iyang nasugatan.
Sumala sa CPPO, giingong hubog ang lalaki ug giti-on niya ang iyang kalibre .38 nga revolver sa mga milabay, lakip ang usa ka 19-anyos nga batan-on. Tungod niini, mitawag dayon og tabang ang mga residente sa Barangay Public Safety Officers (BPSO).
Naabtan sa mga BPSO ang lalaki ug ilang gikuptan hangtod miabot ang kapulisan. Sa pag-inspeksyon, wala siya makapakita og lisensya o permit sa iyang pusil. Nakuha usab gikan kaniya ang usa ka kalibre .38 nga revolver ug usa ka buhing bala.
Gibantayan karon sa Talisay City Police Station ang suspetsado samtang giandam ang mga kaso batok kaniya, lakip ang grave threats ug ilegal nga pagpanag-iya og armas. Gipasalamatan usab sa CPPO ang paspas nga pagtabang sa mga BPSO ug mga residente aron malikayan ang mas grabe nga hitabo.
I via Renante Socia Lada