Gihangyo sa Cebu Provincial Board ang DepEd Central Visayas ug DepEd Cebu Province nga palig-onon pa ang seguridad sa tanang eskwelahan sa lalawigan.
Tumong niini nga masiguro ang kaluwasan sa mga estudyante, magtutudlo, ug uban pang kawani sa eskwelahan. Kabahin kini sa Cebu Safe Schools Program nga gilunsad sa Lalawigan sa Cebu.
Nag-awhag kini sa mga eskwelahan nga mag-andam batok sa posibleng peligro, magpalig-on sa seguridad, ug magtinabangay ang DepEd, kapulisan, ginikanan, ug komunidad. Matod sa DepEd, usa sa ilang mga lakang mao ang pagpalit og metal detector gamit ang pondo sa eskwelahan.
Apan giingon usab nila nga adunay pipila ka eskwelahan nga wala pa’y kural, maong lisod pa nga mapalig-on pag-ayo ang seguridad. Gipalig-on usab nila ang pagtudlo sa maayong pamatasan ug pag-atiman sa mental health sa mga estudyante.
Gipasabot usab sa DepEd nga dili bawal ang pagdala og cellphone sa eskwelahan. Apan dili kini mahimong gamiton sulod sa klase gawas kung gitugotan sa magtutudlo alang sa pagtuon.
Nagpadayon usab ang panawagan sa Provincial Board nga ang tanang pampubliko ug pribadong eskwelahan magtinabangay aron mahimong luwas ang palibot sa mga estudyante.
I via Renante Socia Lada