Nadakpan sa mga sakop sa Guadalupe Police Station 9 ang usa ka 27-anyos nga lalaki nga Top 1 Most Wanted Person sa kaso sa statutory rape, atol sa operasyon nga gipangulohan ni PMAJ Miles B. Damoslog, hepe sa estasyon, niadtong Abril 7, 2025 sa Good Shepherd, Barangay Guadalupe, dakbayan sa Sugbo.
Base sa Warrant of Arrest nga gi-isyu sa Regional Trial Court (RTC) Branch 74, Cebu City niadtong Marso 25, 2025, ang suspek giakusahan sa pagpanglugos sa usa ka menor de edad nga ubos pa sa 16 anyos ang panuigon. Ang kaso walay gi-rekomendang piyansa.
Gipahibalo ang akusado sa iyang legal nga mga katungod ug kasamtangang nagpabilin sa kustodiya sa Guadalupe Police Station 9, samtang nagpaabot sa sunod nga legal nga proseso.
Si PCOL Enrico E. Figueroa, Acting City Director sa Cebu City Police Office, mipadayag sa iyang pagpasalamat ug garbo sa mga sakop sa Guadalupe Police Station 9 sa ilang dedikasyon ug walay puas nga serbisyo.
Gimanduan usab niya ang tanang yunit sa kapulisan nga ipadayon ang pagpalig-on sa kampanya batok sa mga wanted persons aron masiguro ang kalinaw ug kalamboan sa dakbayan.
Source: CCPO
I via Renante Socia Lada
#rpndykccebu