Usa ka anti-drug operation ang gipahigayon sa Mandaue City nga miresulta sa pagkasakmit sa iligal nga drogas nga nagkantidad og P6.8 milyon, nga usa ka dakong kalampusan alang sa Police Regional Office 7 (PRO7) sa ilang padayong pakigbatok sa kalihukan sa ginadiling drogas sa rehiyon.
Ang maong operasyon nahitabo niadtong Abril 7, 2025, alas 9:08 sa gabii, pinaagi sa tinabangay nga lihok sa City Intelligence Unit/City Drug Enforcement Unit, Mandaue City Police Office (MCPO), ug sa Philippine Drug Enforcement Agency Regional Office 7 – Regional Special Enforcement Team (PDEA RO7 RSET MCO).
Nahimo ang operasyon sa Purok Tambis, Sitio Laray, Barangay Umapad, Mandaue City, diin nadakpan ang usa ka 28 anyos nga high-value target nga suspek nga lumulupyo sa Barangay Tunghaan, Minglanilla, Cebu.
Nakuha gikan sa suspek ang gibana-bana nga 1 kilo nga shabu nga nagkantidad og P6,800,000.00. Apil usab sa nakumpiska mao ang buy-bust money, usa ka sling bag diin gitago ang drogas, ug cellphone nga gigamit sa transaksyon.
Matod ni PBGen Redrico Maranan, Regional Director sa PRO7, nga bisan pa man sa maong dakong kalampusan batok ilegal nga drugas, dili gihapon sila muhunong sa palig alayon sa kumunidad aron hingpit nga masumpo ang problema sa ginadiling drugas sa kumunidad.
Gidugang pa niya nga ang pagdakop sa suspek dako og epekto sa drug supply chain sa lugar, ug gilauman nga mokunhod ang suplay sa iligal nga drogas.
Padayon usab ang imbestigasyon aron mailhan ang uban pang nalambigit sa maong operasyon.
Ang suspetsado kasamtangang gibilanggo sa Police Station 1 sa Mandaue City Police Office, samtang giproseso ang mga dokumento alang sa pagsang-at og kaso batok kaniya sa korte.
Source: PRO7- PIO
I via Renante Socia Lada
#rpndykccebu