Nadakpan sa kapulisan ang Top 1 Most Wanted Person sa lebel sa munisipyo atol sa operasyon niadtong miaging adlaw sa Barangay Cambuhawe, Balamban, Cebu. Apil usab nga gidakop ang inahan sa suspek human kini giingong misamok ug mibabag sa legal nga pagdakop sa iyang anak.
Ang nag-unang suspek nga nailhan sa alyas “Mar,” 26 anyos, ulitawo ug walay trabaho, nadakpan sa Tracker Team sa Balamban Municipal Police Station pinaagi sa warrant of arrest tungod sa paglapas sa Section 5, Article II sa Republic Act 9165 o Comprehensive Dangerous Drugs Act. Aduna na usab kini’y existing nga sentensya gikan sa korte.
Samtang gipahigayon ang operasyon, ang inahan sa suspek nga nailhan sa alyas “Em,” 46 anyos, giingong misinggit, mibabag ug mitukmod sa mga pulis aron pugngan ang pagdakop. Tungod niini, gidakop usab siya sa kasong Obstruction of Justice ug paglapas sa Article 151 sa Revised Penal Code. Ang suspek usab nag-atubang og dugang kaso ubos sa maong balaod tungod sa iyang pagbatok.
Ang duha ka nadakpan gipahibalo sa ilang katungod ubos sa Miranda Doctrine ug Anti-Torture Act sa pinulongang ilang nasabtan. Sa pagkakaron, sila gitanggong sa Balamban Municipal Police Station samtang naghulat sa pormal nga pagturn-over sa korte.
Gidayeg ni Provincial Director PCOL Abubakar Udang Mangelen Jr. ang operasyon ug giingong padayon ang ilang kampanya batok sa mga wanted ug sa mga mosupak sa balaod aron mapadayon ang kalinaw ug kahapsay sa komunidad.
Source: CPPO
I via Renante Socia Lada