Nadakpan ang pipila ka mga drayber tungod sa pagmaneho ubos sa impluwensya sa alkohol atol sa usa ka hiniusang operasyon sa Cebu City Police Office (CCPO) ug Land Transportation Office Region 7 (LTO-7) sayo sa buntag karong Abril 11, 2026. Ang operasyon gipahigayon ubos sa liderato ni City Director PCOL George V. Ylanan isip kabahin sa padayon nga kampanya batok sa mga traffic violations ug aron mapalig-on ang kaluwasan sa kadalanan.
Ang Traffic Enforcement Unit (TEU) sa CCPO, kauban ang LTO-7, nagpatuman og roadside inspection sa F. Cabahug Street ug kasikbit nga mga lugar sa Barangay Kasambagan. Tumong sa operasyon ang pagpatuman sa Republic Act 10586 o Anti-Drunk and Drugged Driving Act of 2013 ug Republic Act 4136 o Land Transportation and Traffic Code.
Atol sa operasyon, daghang mga motorista ang gipahunong ug gi-evaluate base sa posibleng paglapas sa balaod. Ang mga drayber gipailalom sa Field Sobriety Test ug Alcohol Breath Analyzer aron matino kung sila ba nagmaneho nga hubog. Tungod niini, daghang violators ang nadakpan ug gipaatubang sa hustong aksyon.
Gipasiugda sa kapulisan nga ang maong operasyon nagpakita sa lig-on nga panagtinabangay sa mga ahensya sa gobyerno aron mapatuman ang disiplina sa kadalanan ug mapanalipdan ang publiko batok sa mga peligro nga dala sa hubog nga pagmaneho. Padayon usab ang ilang panawagan sa mga motorista nga mosunod sa balaod aron malikayan ang aksidente ug silot.
Source: CCPO
I via Renante Socia Lada