Nagpatuman og drone patrol operations ang Police Regional Office 8 (PRO-8) sa tibuok Eastern Visayas sugod Abril 9 hangtod 11, 2026, isip kabahin sa ilang kusog nga kampanya batok sa kriminalidad ug alang sa mas paspas nga aksyon sa kapulisan.
Ang operasyon gipangulohan ubos sa direksyon ni PBGEN Jason L Capoy, Regional Director sa PRO-8.
Pinaagi sa paggamit sa drone, mas mapaayo ang real-time monitoring sa mga kapulisan sa mga importanteng lugar. Nakatabang kini sa pag-detect sa mga posibleng krimen ug kahimtang nga makahatag og hulga sa kalinaw ug seguridad sa komunidad.
Sumala sa PRO-8, ang aerial surveillance pinaagi sa drone nakatabang usab sa mas episyente nga pag-deploy sa mga pulis, pagpalig-on sa police visibility, ug mas paspas nga responde sa mga insidente.
Gipasiugda usab sa PRO-8 nga ang paggamit sa modernong teknolohiya usa ka paagi sa mas epektibong pagsikop sa kriminalidad ug pagserbisyo sa publiko, samtang nakatabang usab sa pagdaginot sa lana tungod sa taas nga presyo sa gasolina.
Nagpadayon ang PRO-8 sa ilang tumong nga magpabilin ang kalinaw ug kahapsay sa rehiyon.
Source: PRO8
I via Renante Socia Lada