Nagpagawas og traffic advisory ang lokal nga kagamhanan sa Lapu-Lapu City alang sa temporaryong pagsirado sa pipila ka mga dalan karong Mayo 7, 2026 isip kabahin sa seguridad ug preparasyon alang sa ika-48 nga ASEAN Summit sa Cebu.
Base sa advisory, adunay mga temporaryong lockdown sa nagkalain-laing oras gikan sa Mactan-Cebu International Airport padulong sa mga hotel diin magpuyo ang mga delegado ug opisyal nga motambong sa summit. Lakip niini ang ruta paingon sa Dusit Thani, Movenpick, JPark, Sheraton ug Shangri-La Hotel.
Lakip usab sa temporaryong road closures ang ASEAN Lane nga sirad-an gikan alas 6:30 hangtod alas 7:15 sa gabii ug alas 8:10 hangtod alas 8:55 sa gabii aron masiguro ang hapsay nga paglihok sa mga delegado sa summit.
Gihangyo sa Cebu Provincial Government, Metro Cebu LGUs, AFP ug PNP ang publiko nga mosabot ug mapailubon tungod sa posibleng traffic delays samtang giseguro ang malinawon ug organisadong pagdumala sa maong internasyonal nga kalihokan.
Giawhag usab ang mga motorista ug commuters nga magplano daan sa ilang biyahe aron malikayan ang grabeng trapiko ug kalangan sa pagbiyahe atol sa ASEAN Summit sa Cebu.
Source: Cebu Province PIO
I via Renante Socia Lada