Magtapok sa Cebu ang mga lider sa Association of Southeast Asian Nations o ASEAN alang sa ika-48 nga ASEAN Summit nga himuon karong Mayo 7 hangtod 8, 2026.
Lakip sa hisgutan sa summit ang pagbag-o sa ASEAN Charter, pagpalig-on sa kooperasyon sa kadagatan, ug hiniusang tubag sa krisis sa Middle East.
Sa press briefing nga gihimo sa Lapu-Lapu City kagahapon Mayo 6, miingon si Assistant Secretary Dominic Xavier Imperial, tigpamaba sa Department of Foreign Affairs alang sa ASEAN Summit, nga gilauman nga maendorso ang tulo ka importanteng dokumento alang sa pag-aprubar sa mga lider sa ASEAN nga motambong sa summit.
Usa sa mga nag-unang hisgutan mao ang “Cebu Protocol” nga nagtumong sa pag-usab sa ASEAN Charter. Kini ang unang higayon nga usbon ang charter sukad kini gisagop niadtong 2007. Lakip sa amendments ang hingpit nga pag-apil sa Timor-Leste isip bag-ong miyembro sa ASEAN.
Kung mapasar, mokompleto ang Timor-Leste sa 11 ka miyembrong nasud sa ASEAN uban sa Brunei, Cambodia, Indonesia, Laos, Malaysia, Myanmar, Pilipinas, Singapore, Thailand ug Vietnam.
Gilauman usab nga mopirma ang mga lider sa deklarasyon bahin sa maritime cooperation aron mapalig-on pa ang panagtinabangay sa rehiyon sa mga isyu sa kadagatan. Lakip sa mga plano ang ASEAN Coast Guard Forum ug ang posibleng pagtukod sa ASEAN Maritime Center dinhi sa Pilipinas.
Magpagawas usab og hiniusang pamahayag ang ASEAN kabahin sa krisis sa Middle East aron ipakita ang kolektibong tubag sa mga nasud sa ASEAN ug pagpalig-on sa koordinasyon alang sa umaabot nga mga emerhensiya.
Matod ni Imperial, importante nga mapalig-on sa ASEAN ang panaghiusa ug koordinasyon tali sa mga miyembrong nasud ilabina karon nga adunay nagkadaghang geopolitical ug regional nga hagit sa kalibutan.
Source: Cebu Province PIO
I via Renante Socia Lada