Gilauman nga hisgutan sa ASEAN Leaders’ Summit sa Cebu ang mga polisiya nga makatabang sa pagpalapad sa merkado alang sa micro, small, and medium enterprises o MSMEs, ug pagpalig-on sa digital economy sa rehiyon.
Matod ni Department of Trade and Industry Undersecretary Allan Gepty, importante nga mapadayon nga bukas ang merkado sa mga nasud sakop sa ASEAN aron mas daghang oportunidad ang mahatag sa mga gagmayng negosyo ilabina panahon sa krisis sa ekonomiya.
Sa press briefing nga gihimo sa Lapu-Lapu City kagahapon Mayo 6, miingon si Gepty nga usa sa tumong sa summit mao ang paghatag og mas lapad nga access sa merkado alang sa MSMEs sa tibuok rehiyon sa ASEAN.
Gipasabot usab niya nga gilauman nga magkasinabot ang mga lider sa ASEAN sa pagpirma sa Digital Economy Framework Agreement, usa ka kasabutan nga magtakda og parehas nga mga lagda sa online trade ug digital transactions sa mga miyembrong nasud.
Ang maong kasabutan gilauman nga makatabang sa pagpalambo sa digital economy sa ASEAN nga posibleng moabot og $2 trillion pagsapit sa 2030. Lakip usab sa palig-onon ang cybersecurity, digital payments ug e-commerce sa rehiyon.
Matod pa ni Gepty, dako og tabang ang online platforms alang sa mga MSMEs aron makasulod sa foreign markets ug makapalapad sa ilang negosyo.
Lakip usab sa hisgutan sa summit ang ASEAN power grid, sustainable agriculture, pagdani og foreign investments, ug paghuman sa ubang trade agreements aron mas mapalig-on pa ang ekonomiya sa ASEAN.
Source: Cebu Province PIO
I via Renante Socia Lada