Usa sa dakong hagit nga giatubang karon sa mga sakop sa Force Gubat sa Baha mao ang “Behavioral Change”, kon pag-usab sa batasan sa mga tawo nga magpataka lang og labay sa ilang mga basura bisan asa.
Kana maoy gitataw sa chief implementer sa Task Force nga si Retired General Melquiades Feliciano, mga duha ka tuig human siya nakahukom nga motabang sa administrasyon ni Mayor Mike Rama, pagsugod isip Covid Inter-agency Task Force Visayas deputy chief implementer.
Iyang gi klaro nga maglisud ang gobiyerno sa pagsulbad sa suliran sa baha dinhi sa siyudad sa Sugbo kung dili gyud mausab ang batasan sa mga tawo.
Bisan paman sa maong hagit ilang gipangusgan ang pagtubag sa maong problema diin aduna na sila’y mga strategy nga gi plano.
Mahinomduman nga niadtong nakalabay na mga adlaw, nagmalamposon ang duha ka adlaw nga “socio-economic profiling” sa Task Force sa mga lugar nga gitadlas sa Butuanon River, ilabi na sa kadtong nasulod sa tres metros nga “easement” sa sapa ilab na dapit sa may Brgy. Talamban ug sa Brgy. Budlaan.
Gihimo usab nila ang profiling ug pag-awhag sa tag-iya sa mga panimalay daplin sa sapa, ilabi na kadtong mga istruktura nga kahugmakon na, sa pagbakwit gilayon ngadto sa luwas nga lugar samtang wala pay disgrasya nga nahitabo.
Samatang ang mga river troopers sa Task Force gipaubos usab sa oryentasyon o seminar sa wa pa gihimo ang socio-economic survey sa Butuanon River.
Nilampos usab ang Task Force sa niaging semana sa paglimpyo sa Guadalupe River, sa may bahin sa Sitio Mahayahay 2, Brgy. Pasil, diin hapit moabot og 20 ka mga tonelada nga nagkalainlaing matang sa basura ang nahaw-as gikan sa sapa.
Nihimo usab og lakang si Feliciano uban sa mga sakop sa “legal” ug sa “clearing committee” alang na pagpatuman sa pagguba niadtong mga nakalapas sa balaod kabahin sa easement ug sa paghinlo sa mga drainages.
Ang river troopers mutabang sa pagpasabot sa mga tawo nga nagpuyo daplin sa mga sapa kung unsa ka mahinungdanon ang pagbinuligay aron pagsulbad sa suliran sa baha, pinaagi sa pagpang-apud-apod og mga flyers. (Renante Socia Lada)
(Source: Cebu City • News & Information)
