Nagpabiling usa sa pinakapopular nga destinasyon sa Central Visayas ang Sugbo human matala ang 5.1 milyon ka turista nga miabot sa isla niadtong 2024. Kini usa ka dako nga bahin sa 7.5 milyon ka mga bisita nga nakatala sa tibuok rehiyon sa miaging tuig, sumala sa datos sa Department of Tourism (DOT)-Region 7.
Matod ni DOT-7 Regional Director Judy Gabato, sa maong ihap, 1.9 milyon ka langyawng turista ang miadto sa Cebu, samtang 3.2 milyon ka mga lokal nga bisita ang nagduaw sa isla-probinsya.
Top 10 ka mga Nasod nga Pinakadaghan og Bisita sa Cebu sa 2024:
- South Korea — 1.028 milyon
- USA — 234,511
- Japan — 226,755
- China — 127,084
- Taiwan — 88,728
- Australia — 71,872
- Germany — 59,341
- France — 54,448
- United Kingdom — 53,459
- Canada — 41,949
Matud pa ni Gabato nga ang Cebu ug Bohol mao gihapon ang labing popular nga destinasyon alang sa mga lokal ug langyawng turista tungod sa ilang dakong kultura, kasaysayan, ug lain-laing atraksyon.
Sa kinatibuk-an, ang 7.5 milyon ka mga bisita sa Central Visayas nakahatag og P125.92 bilyon nga kita sa turismo. Gibanabana nga ang matag turista naggasto og $2,073 matag bisita.
Dugang pa, ang gidugayon sa mga turista sa rehiyon, nga nisaka na og 11 ka gabii kumpara sa siyam (9) ka gabii nga natala sa 2019. Tungod niini, nakatabang usab ang turismo sa paghimo og 1.5 milyon ka trabahong direkta ug dili direkta sa Central Visayas sa miaging tuig.
Source: Cebu Provincial Capitol, PIO
I via Renante Socia Lada