Dul- an 4,000 ka mga bakanteng trabaho ang giandam alang sa mga jobseekers sa umaabot nga “123rd Labor Day Job Fair” karong Mayo 1, 2025, nga ipahigayon sa Mountain Wing Atrium sa SM Seaside City Cebu.
Ang maong job fair gipasiugdahan sa Department of Labor and Employment (DOLE) – Region 7, uban sa suporta sa Kagamhanan sa Dakbayan sa Sugbo pinaagi sa Department of Manpower Development and Placement (DMDP)-PESO Cebu City, ug sa pakigtambayayong sa SM Seaside City Cebu.
Sumala ni Dr. Anthony Aguhar, hepe sa DMDP, ang kalihokan usa ka pamatuod sa padayong paningkamot sa paghatag og daghang oportunidad sa mga mamumuo.
Dugang pa niya, “Come explore varied employment options, with our added service features like career support services, and relevant self-employment initiatives as we construct a better future for Filipino workers.”
Salmotan ang job fair sa 35 ka kompanya gikan sa nagkalain-laing sektor sama sa manufacturing, food industry, wholesale and retail, education, ug Business Process Outsourcing (BPO).
Gikatakdang magsugod ang kalihokan pinaagi sa registration ug pre-screening sa mga aplikante gikan alas-8:30 hangtod alas-10:30 sa buntag. Tibuok adlaw nga panghitabo ang giandam, diin adunay 3,743 ka trabaho nga gi-offer sa publiko.
Giawhag ang tanan nga interesado nga magdala sa ilang pinaka-bag-ong resume og mag andam nga mopasundayag sa ilang kahibalo ug kahanas.
Source: Cebu City PIO
I via Renante Socia Lada