Kapin P40 milyon ang kantidad sa shabu nga nasakmit sa mga pulis sa Negros Oriental human sa sunod-sunod nga anti-drug operations, sumala sa taho sa Philippine National Police (PNP) karong adlawa, Abril 30, 2025.
Matod ni Lt. Stephen Polinar, tagpamaba sa Negros Oriental Police Provincial Office (NOPPO), gikan Enero 1 hangtod Abril 30, 2025, nakahimo ang kapulisan og 183 ka operasyon batok sa ilegal nga drogas sa tibuok probinsya.
5,892 ka gramos sa shabu ang nakuha ug 191 ka tawo ang nadakpan, diin 16 niini giila nga high-value targets.
Gawas pa niini, 181.2 ka gramos sa marijuana nga nagkantidad og P34,500 ang nasakmit usab.
Sa laing bahin, gipakusog usab sa kapulisan ang kampanya batok sa mga ilegal nga pusil nga walay rehistro. Nagkahimo sila og 356 ka operasyon, nagserbi og 10 search warrant, ug nadakpan ang 17 ka tawo. 374 ka pusil ang narekover.
Pinaagi sa Oplan Katok, nga nag-awhag sa mga tawo nga isurender ang ilang pusil nga walay papeles, 72 ka armas ang boluntaryong gihatag sa kapulisan.
Gidugang ni Polinar nga 84 ka Most Wanted Persons ug 587 ka ubang wanted ang nasikop sulod sa maong panahon.
Gihimo kini nga mga lakang aron masiguro ang kalinaw ug kahapsay ilabi na duol na ang eleksyon karong Mayo 12 ug panahon sa ting-init nga daghan ang mga turista.
Source: PNA
I via Renante Socia Lada