Malampuson nga gipahigayon sa Cebu City Police Office (CCPO) ang ilang One-Time-Big-Time Operation gikan sa gabii sa Hunyo 30 hangtod sa kadlawon sa Hulyo 6, 2025. Ilawom sa Oplan Bulabog ug Oplan Bakal-Sita, ang operasyon gitambongan sa liboan ka personnel, mga opisyales sa lokal nga kagamhanan, force multipliers, ug mga boluntaryo nga mituyok sa tanang 80 ka barangay sa syudad.
Pinangulohan ni Acting City Director PCOL Enrico E. Figueroa ug gisuportahan sa Police Regional Office 7 ilawom ni PBGEN Redrico A. Maranan, ang operasyon nagtumong sa pagpatuman sa lokal nga ordinansa ug pagsumpo sa krimen. Sa ilang kampanya, nakainspeksyon sila sa 1,267 ka establisyemento ug nakaluwas og 286 ka mga minor de edad nga nasakpan nga milapas sa curfew.
Nasikop usab sa kapulisan ang tulo ka giingong drug suspects, lakip ang usa ka 47-anyos nga taxi driver nga taga-Barangay Duljo-Fatima. Naluwas usab ang duha ka menor de edad – usa ka 17-anyos nga ALS student sa Barangay Sawang Calero ug usa ka 16-anyos nga Grade 7 student sa Barangay Mambaling.
Sa operasyon, nasakmit ang kapin ₱148,240 nga kantidad sa gituhuang shabu nga mitimbang og 21.80 gramos. Dugang pa, upat ka violation tickets ang gipagawas batok sa mga nakalapas sa balaod sama sa pagpanglabay og sigarilyo sa pampublikong lugar.
Nagpabilin ang dedikasyon sa CCPO sa pagpanalipod sa katawhan ug pagpangita og paagi aron malikayan ang kriminalidad. Ang ilang panaghiusa sa komunidad usa ka dakong lakang padulong sa luwas ug malinawon nga dakbayan sa Sugbo.
Source: CCPO
I via Renante Socia Lada