Usa ka makapadasig nga binulan nga tigum ang gihimo sa Consolacion Sarok Sigasig Eagles Club kagabii, Hulyo 11, 2025, didto sa lungsod sa Compostela. Ang maong panagtigom nagsentro sa ilang mga plano alang sa umaabot nga socio-civic nga mga kalihukan nga gitumong aron makatabang sa mga kabus ug komunidad.
Sa nasangpit nga panagtigom, usa sa labing gipalabi nga hisgutanan mao ang plano sa paghatag og mga balay alang sa mga kabus nga walay kaugalingong puloy-anan ug wala masakop sa mga benepisyo sa gobyerno. Usa kini ka proyekto nga nagpakita sa ilang tinguha nga dili lang magdepende sa ayuda sa goberno apan magmugna og kaugalingong inisyatiba aron mas daghan ang matabangan.
Gihisgutan usab sa mga miting ang pagpahigayon og regular nga feeding programs alang sa mga kabataan sa komunidad, ingon man ang paghatag og suporta sa mga tunghaan pinaagi sa donasyon og mga gamit-pang-eskwela ug uban pang proyekto nga makapauswag sa edukasyon.
Gipangulohan ang maong tigum ni Constancio “Boy” Go, ang presidente sa club, uban sa uban pang mga opisyal ug aktibong miyembro. Iyang gi-awhag ang tanang miyembro sa pagpadayon sa ilang paningkamot ug pagpakabana sa katawhan, ilabina karong panahona nga daghang komunidad ang nanginahanglan og dugang nga tabang.
Ang Sarok Sigasig Eagles Club padayon nga nagpadako sa ilang impluwensiya ug serbisyo, dili lang sa Consolacion kondili lakip na sa ubang lugar sa Sugbo. Sa ilang paningkamot, ilang gipakita nga ang tinuod nga pag-alagad nagagikan sa kasingkasing ug pagkahiusa sa tibuok katilingban.
I via Renante Socia Lada ug Ting Joe Pepito