Niadtong adlaw nga Huwebes, mipasa og Counterpart Bill sa Kongreso alang sa Senate Bill No. 3001 si 4th District Representative Sun Shimura, nga nagtumong sa pagtangtang sa Senior High School sa sistema sa edukasyon sa Pilipinas.
Ang maong balaodnong giulohan og: “An Act Rationalizing the Philippine Basic Education System by Removing the Senior High School Amending Pertinent Provisions of Republic Act No. 10533 o Enhanced Basic Education Act of 2013.”
Ang maong inisyatiba gitumong aron tubagon ang dugay nang reklamo ug pangutana sa katawhan, ilabina sa mga pobreng ginikanan, kabahin sa K-12 program. Sa kapin usa ka dekada sukad kini gimando, wala pa gyud kini nakahatag og klaro nga kausaban sa kalidad sa edukasyon bisan pa sa dugang duha ka tuig sa basic education.
Usa sa katuyoan sa K-12 mao ang pagpangandam sa mga estudyante aron makatrabaho human sa senior high school. Apan sa tinuod, daghang kompanya — lakip na ang gobyerno — ang nagkinahanglan gihapon og college degree. Kini nagpasabot nga ang gipaabot nga benepisyo sa K-12 wala maabot ug nahimong dugang lang nga kalisdanan.
Tungod sa kahimtang, mas nagkadaghan ang trabahante nga walay kapadulngan nga trabaho, samtang limitado ang mga bakanteng posisyon. Labaw pa, ang dugang duha ka tuig sa pag-eskwela nakapadugang sa gasto nga gipas-an sa mga ginikanan, ilabina sa mga kabus nga pamilya.
Pinaagi sa pagpasa sa balaodnon masugdan na ang lakang aron usbon ang sistema sa edukasyon sa mas praktikal ug epektibong pamaagi — nga makatabang gyud sa kinabuhi ug kaugmaon sa kabatan-onan. Kini nga paningkamot usa ka tubag sa tinuod nga tingog sa katawhan nga dugay nang nagpaabot og kausaban.
Source: Cong. Sun Shimura
I via Renante Socia Lada