Ang Cebu City Police Office (CCPO) malampusong midakop sa suspek sa pagpusil-patay kang Konsehal Ramon Diamante sa Barangay Sawang Calero, Cebu City.
Ang suspek nadakpan atol sa buy-bust operation nga gihimo mga alas 5:35 sa buntag niadtong Marso 3, 2026, sa Sitio Almacin, Barangay Calamba, Cebu City.
Ang operasyon gipangulohan sa mga operatiba sa Police Station 6 ubos sa liderato ni Giann Karlo M Reyes. Nadakpan ang suspek nga nailhan sa alyas “Ven” human kini nakigtransaksyon sa usa ka poseur buyer. Dugay na kining gibantayan sa kapulisan tungod sa giingong pag-apil niini sa ilegal nga drogas ug sa pagpatay sa maong konsehal.
Sa dugang imbestigasyon, nakumpirmar nga si alyas “Ven” sakop sa usa ka gun-for-hire group nga naglihok sa Cebu City. Sa miaging mga operasyon, duha na ka miyembro sa maong grupo ang nadakpan apil ang giingong gigamit nga motorsiklo sa pag-ikyas. Ang usa pa ka miyembro nasikop usab samtang naa sa ospital tungod sa samad pinusilan. Tungod sa pagdakop kang “Ven,” ang upat ka miyembro sa grupo anaa na karon sa kustodiya sa CCPO.
Narekober sa operasyon ang gituohang shabu nga may gibug-aton nga 60.06 gramos ug balor nga ₱408,408, sumala sa standard drug price. Nakuha usab ang usa ka .45 kalibre nga pistola. Ang laing .45 kalibre nga pusil nga giingong gigamit sa pagpatay sa konsehal, narekober usab sa Mandaue City.
Ang suspek karon gitanggong sa Police Station 6 samtang giandam ang kaso batok kaniya tungod sa paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002, ug paglapas sa Republic Act No. 10591, gawas pa sa kasong may kalabutan sa pagpatay.
Matod pa ni PCOL. Enrico Figueroa Ylanan, kining kalampusan nagpakita sa lig-on nga paningkamot sa kapulisan sa pagdakop sa mga kriminal ug paghatag hustisya sa biktima. Gipasalig usab sa CCPO nga magpadayon ang ilang kampanya batok sa krimen aron mapadayon ang kalinaw ug kahapsay sa Cebu City.
Source: CCPO
I via Renante Socia Lada