Nagtigom ang Provincial Nutrition Committee–Technical Working Group niadtong Marso 3 sa Hall 3, Capitol Building sa Dipolog City aron hisgutan ang monitoring ug evaluation sa Monitoring and Evaluation of Local Level Plan Implementation Protocol o MELLPI Pro ug Local Nutrition Action Plan. Tumong sa tigom ang pag-ila sa kakulangan ug panginahanglan sa matag lokal nga panggamhanan aron mas mapalig-on ang nutrisyon nga programa sa probinsya.
Gipangunahan ni Dr. Benson Panaguiton, Acting Provincial Health Officer ug PNAO Designate, ang maong miting ug gipasiugda ang kahinungdanon sa maayong ebalwasyon sa nutrisyon nga mga programa. Iyang gihisgutan nga padayon nga hagit sa komunidad ang malnutrisyon ug teenage pregnancy, busa gikinahanglan ang mas hugot nga pagpatuman sa mga plano ug kalihokan.
Subay sa direktiba sa National Nutrition Council Region 9 ug sa pagsuporta sa Philippine Plan of Action for Nutrition 2023–2028, gimando ang tanang Local Government Units sa pagpatuman sa Operation Timbang Plus sulod sa unang kwarter sa tuig ug sa tukmang pagsumite sa mga report gikan sa barangay hangtod sa rehiyon sumala sa gitakdang petsa. Gikinahanglan usab ang pagpatuman sa MELLPI Pro sa tanang lebel sa lokal nga panggamhanan ug ang pagsumite sa kumpletong score sheets alang sa performance audit.
Ang maong mga lakang subay sa DILG Memorandum Circular No. 2024-071, ug ang dili pagtuman magkinahanglan og sinulat nga eksplanasyon gikan sa hingtungdan nga LGU. Gidirekta usab ang tanang DILG Field Officers sa pagmonitor sa compliance ug paghatag og teknikal nga tabang aron masiguro ang epektibong implementasyon sa mga programa sa nutrisyon.(JENIFFER JR. DELICA)
Source: Zamboanga del Norte Provincial News Network
Sent from Outlook for Android