Nasikop sa mga pulis ang Top 2 Most Wanted Person sa municipal level sa lungsod sa Balamban, Cebu atol sa operasyon nga gibase sa intelihensya niadtong nakalabay nga mga adlaw sa Barangay Buanoy, Balamban.
Ang nadakpan nailhan sa alyas “Joe,” hamtong na ang edad, ulitawo, ug residente sa maong barangay. Gidakop siya pinaagi sa warrant of arrest tungod sa kasong Acts of Lasciviousness ubos sa Article 336 sa Revised Penal Code nga may kalabotan sa Section 5(b) sa Republic Act 7610.
Ang warrant of arrest gipagawas sa Regional Trial Court Branch 8 sa Toledo City niadtong Pebrero 19, 2026, ug adunay piyansa nga gitakda nga ₱120,000.
Gidayeg ni PCol. Abubakar Udang Mangelen Jr., Provincial Director sa Cebu Police Provincial Office, ang operating team sa ilang kalampusan. Matud pa niya, padayon nilang pangitaon ug dakpon ang mga wanted person aron maatubang ang mga kaso nga gisang-at batok kanila, ilabi na ang mga krimen batok sa mga kabos ug walay ikasukol.
Nag-awhag usab ang CPPO sa publiko nga magpadayon sa pagtabang sa kapulisan pinaagi sa pagreport sa mga wanted person ug mga iligal nga kalihokan sa ilang komunidad.
Source: CPPO
I via Renante Socia Lada