Dako ang pasalamat ni Police Brigadier General Redrico A. Maranan, Regional Director sa PRO-7, sa paspas nga aksyon sa Toledo City Police nga midakop sa usa ka tulisan sulod lamang sa 3 ka minutos human kini nanulis sa usa ka delivery rider kagahapong adlawa, Hunyo 24, 2025 sa Barangay Talavera, Toledo City.
Base sa imbestigasyon, ang suspetsado usa ka 37-anyos nga lalaki nga taga Toledo City. Gipasanginlan siya nga ni-book og Maxim rider gikan sa South Bus Terminal sa Cebu City ug gihangyo nga dad-on siya sa Tabunok, Campo 1 sa Talisay, ug padulong sa Barangay Dumlog sa Toledo. Sa ilang biyahe, gipugos sa suspetsado ang biktima usa ka 49-anyos nga lalaki gikan sa Talisay City ug gikuha ang kwarta. Gihulga pa niya ang rider nga dili mo sumbong sa kapulisan.
Apan bisan pa sa hulga, ang biktima midangop dayon sa mga nagpatrolya nga pulis sa Barangay Sangi. Paspas nga mitubag ang kapulisan ug sa wala pa ang tulo ka minuto, ilang nadakpan ang suspetsado.
Gikustodiya na karon ang tulisan ug andam na pasakaan og kaso nga robbery with intimidation, nga silutan og prisuhon sulod sa
4 ka tuig ug 2 ka bulan hangtod 10 ka tuig, sumala sa Article 294 sa Revised Penal Code.
Gipasiugda ni PBGen Maranan nga ang maong insidente nagpamatood sa ka-epektibo sa presensya ug paspas nga reaksyon sa kapulisan.
Gihangyo usab niya ang publiko, labi na ang mga taga-Central Visayas, nga kung dunay katalagman, modangop dayon sa pinakaduol nga pulis o tawag sa 911 alang sa tabang.
Source: PRO7