Duha ka lalaki ang namatay sa duha ka managlahi nga insidente sa pagkalumos sa mga lugar sa Panglao ug Tagbilaran City niadtong Domingo, Hunyo 22, 2025.
Ang unang biktima giila nga si Abdul Wallace, 39 anyos, anak sa tag-iya sa inila nga Bohol Bee Farm. Sumala sa Panglao Police, nanagat si Wallace sa kadagatan duol sa Virgin Island, Barangay Poblacion, Panglao. Wala siya magsul-ob og breathing apparatus samtang naglangoy, ug gituohang nalumos siya human mosulay og balik sa ibabaw sa tubig.
Matod ni Master Sgt. Renante Foculan sa Panglao Police Station, miadto si Wallace ug ang iyang kauban sa lawom nga bahin sa dagat sakay og pumpboat. Didto na nahitabo ang insidente sa buntag sa Domingo.
Ang ikaduhang biktima giila nga si Aleksei Gribanov, 55 anyos, usa ka Russian national nga temporaryong nagpuyo sa Tagbilaran City. Wala pa ipagawas ang dugang detalye sa iyang pagkamatay apan giingon nga kini usa usab ka kaso sa pagkalumos.
Nagpadayon ang imbestigasyon sa mga otoridad sa Bohol aron masuta ang tibuok detalye sa panghitabo. Gihangyo usab ang publiko nga mag-amping ug magsunod sa mga safety protocols kon maglangoy o managat.
I via Renante Socia Lada