Human sa walo ka tuig nga pagkatago-tago, nasikop na sa mga sakop sa Aloguinsan Municipal Police Station ang usa ka lalaki nga punangita sa balaod tungod sa kasong rape.
Ang pagdakop gihimo niadtong Pebrero 2, 2026 sa Purok 3, Barangay Angilan, Aloguinsan, Cebu, pinasikad sa usa ka alias warrant of arrest.
Ang suspek, nga giila lamang sa alyas nga “Mardo,” 68 anyos ug usa ka construction worker, residente sa Sitio Napo, Barangay Bonbon, Aloguinsan. Sumala sa kaoulisan, dugay na kining milikay sa awtoridad sukad pa sa pag-isyu sa warrant batok kaniya.
Ang alias warrant of arrest gi-isyu sa Regional Trial Court Branch 59 sa Toledo City. Ang mga kaso batok sa suspek mao ang rape nga walay piyansa ug rape through sexual assault nga adunay piyansa nga ₱200,000. Matod sa cppo, dugay na nilang gisubay ang lihok sa suspek hangtod sa ilang kalampusan sa pagdakop.
Gipasalamatan ni PCOL Abubakar Udang Mangelen Jr., Provincial Director sa Cebu Police Provincial Office, ang arresting team tungod sa ilang pagkamadasigon ug wala pag-undang. Matod niya, nagpakita kini nga andam ang kapulisan sa pagpaningkamot aron matuman ang hustisya bisan pa man sa kadugayon sa panahon.
Padayon usab ang Cebu Police Provincial Office sa pagpahugot sa ilang kampanya batok sa mga wanted persons aron masiguro ang kalinaw ug kahapsay sa tibuok probinsya sa Cebu.
Source: CPPO
I via Renante Socia Lada