Mitahan sa mga otoridad ang giingong suspek sa pagpatay sa taxi driver nga si Johnny Burdas, 47-anyos, nga taga-Barangay Bankal. Ang krimin nahitabo sa kadlawon sa Hulyo 2 sa Sitio Kaisko, Barangay Mactan.
Ang 30-anyos nga suspek boluntaryong miadto sa Mactan Police Station 2 kagabii, Hulyo 10, 2025, ug nitug-an sa iyang sala. Gitudlo usab niya ang lugar diin gilubong ang .45 kalibre nga pistola nga gigamit sa krimen.
Sa inisyal nga report, giingon nga tulis ang hinungdan sa insidente. Apan sa padayon nga imbestigasyon, migawas nga posibleng usa ka “love triangle” ang tinubdan sa krimen. Nasayran sa kapulisan nga ang biktima nakauyab og estudyante nga babaye, nga posible nga adunay kalambigitan sa suspek.
Matud sa suspek, misurender siya tungod sa dakong konsensya nga gibati human sa nahitabo. Wala pa niya diretsong gipasabot ang motibo, apan giila sa mga otoridad nga ang emosyonal nga rason ang posible nga nagduso kaniya sa maong buhat.
Gipasabot ni PLTCOL Christian Torres, tigpamaba sa Lapu-Lapu City Police Office (LCPO), nga ilang gitinguha nga maprotektahan ang integridad sa imbestigasyon mao nga wala pa ibutyag ang ngalan sa suspek, subay sa bag-ong protocol sa kapulisan.
Padayon pa karon ang pangimbestigar sa maong kaso aron masuta ang tinuod nga motibo sa krimen ug ang kalambigitan sa giingong love triangle.
I via Renante Socia Lada