Usa ka ordinaryong gabii sa Pier 3, Barangay Tinago, siyudad sa Sugbo, miresulta og kahadlok ug kamatayon human gibungkag kini sa kalit nga pagpamusil nga mitumaw sa tunga-tunga sa kasamok sa ticketing area, nahitabo kini pasado alas 7:00 kagabii, Hulyo 10, 2025.
Giila ang biktima nga si Junie Catina, 34-anyos, usa ka otap vendor, Sumala sa saksi nga iyaan sa biktima, kalit lang mibutho ang duha ka lalaki sakay og itom nga motorsiklo, ug ang backrider diretsong nipabuto og pusil nga miigo sa likod ni Catina.
Ang iyang igsoon nga si Joey Catina, 33-anyos, naigo sa dughan sa usa ka saag nga bala samtang nagbarug sa daplin, samtang usa pa ka babaye nga si Geralyn Batucan, 56-anyos nga lumulupyo sa Naval, Biliran nga naghulat lang sa iyang ticket, napagan sab og naigo sa tiil.
Human sa hitabo, ang mga suspek misibat palayo sa maong lugar, samtang ang kapulisan sa Waterfront Police Station padayon nga nagsusi sa posibleng motibo sa maong pamusil. Sa lugar narekober ang unom ka kabhang sa armas nga wala pa matino ang kalibre.
Padayon pa ang imbestigasyon sa kapulisan aron maila ang mga mamumuno ug matino ang motibo niini.
I via Renante Socia Lada