Nadakpan sulod lamang sa pipila ka oras ang usa ka suspetsadong tulisan human kini gipasanginlang nangawat sa usa ka internet café sa Barangay Tayud, Consolacion, Cebu karong Hulyo 1, 2026. Dako ang natabang sa CCTV footage ug sa pagkamabinantayon sa mga Barangay Tanod aron dali mailhan ug madakpan ang suspek.
Sumala sa kapulisan, ang suspetsado nga giila lamang sa alyas nga “Cidrick” giingong giguba ang pultahan sa internet café alas 12:56 sa kadlawon ug gikawat ang upat ka Pisonet coin boxes nga nagkantidad og ₱20,000. Anaa usab sulod niini ang gibanabanang ₱8,000 nga sinsilyo. Pag-abli sa tag-iya sa establisemento pagkabuntag, iyang nakita ang guba nga kandado ug ang pagkawala sa mga coin box, busa iyang gisusi ang CCTV nga nakakuha sa hitabo.
Giila dayon sa Barangay Tanod nga si David Enterina ang suspetsado pinaagi sa CCTV tungod kay kini nag-abang og apartment sa maong barangay. Uban sa kaubang Barangay Tanod nga sila Samuel Debalucos ug Susano Judaya, gilusad dayon ang operasyon nga misangpot sa pagdakop sa suspetsado.
Nabawi usab ang mga gikawat nga Pisonet coin boxes nga gilabay sa kasagbotan duol sa iyang giabangan. Gitugyan dayon ang suspetsado sa Consolacion Municipal Police Station aron atubangon ang hustong kaso.
Gidayeg ni PRO-7 Regional Director PBGen. Arnold E. Abad ang mga Barangay Tanod tungod sa ilang paspas nga aksyon ug pagkamabinantayon. Matud niya, ang CCTV ug ang lig-on nga panagtinabangay sa komunidad ug kapulisan nakatabang pag-ayo sa dali nga pagsulbad sa maong krimen.
Giawhag usab niya ang mga tag-iya sa negosyo ug mga residente nga magbutang og CCTV aron makatabang sa pagpugong sa krimen ug pagpasayon sa imbestigasyon.
I via Renante Socia Lada