Nadakpan sa kapulisan ang usa ka suspetsado nga giilang “CZAR”, nga usa sa mga Regional Most Wanted Person, atol sa usa ka intelligence-driven operation sulod sa usa ka resort complex sa Cebu City kagabii sa Hunyo 30, 2026.
Sumala sa Police Regional Office 7 (PRO7), ang operasyon gipahigayon sa mga operatiba sa Regional Intelligence Division uban sa Muntinlupa City Police Station human makadawat og kasaligan nga impormasyon bahin sa gipuy-an sa suspetsado.
Ang suspetsado nag-atubang og kasong paglapas sa Republic Act No. 10883 o Anti-Carnapping Act of 2016. Ang warrant of arrest gipagawas sa Regional Trial Court Branch 205 sa Muntinlupa City ug adunay piyansa nga ₱300,000.
Human sa pagdakop, gidala ang suspetsado sa RPDEU7 Custodial Facility alang sa hustong dokumentasyon ug custodial procedures sa dili pa itugyan sa korte nga nagpagawas sa warrant.
Gipasidunggan ni Police Brigadier General Arnold E. Abad, Regional Director sa PRO7, ang Tracker Team ug tanang operatiba sa ilang dedikasyon sa pagdakop sa mga wanted person. Matud pa niya, padayon nga palig-onon sa PRO7 ang intelligence-driven operations aron masiguro nga madakpan ang tanang mga naglikay sa balaod ug mapadayon ang kalinaw ug kahapsay sa Central Visayas.
I via Renante Socia Lada