Gibida sa Cebu Butanding Tchoukball ang ilang pagpangandam alang sa 11th Asia Pacific Tchoukball Championships 2026 atol sa ilang pagbisita ug interbyu sa programang Tandem Express sa RPN DYKC Cebu, nga gidumala nila Anchorman Renante Lada ug Anchorman Ting Joe Pepito.
Atol sa interbyu, gipaila-ila ni Coach Jon Stephen Santamaria ug sa team ang Tchoukball isip usa ka non-contact sport nga nagpunting sa respeto, teamwork, ug fair play. Matud nila, ang tumong sa dula mao ang paglabay sa bola ngadto sa rebounding frame aron motugpa kini sa salog nga dili madakpan sa kontra. Tungod kay walay pisikal nga bangga, mas luwas kini ug makapamenos sa kadaot sa mga magdudula.
Gipaambit usab sa team nga ang Cebu Butanding Tchoukball, nga gitukod ni Pastor Jonathan Santamaria, nagsugod isip sports ministry sa Christian Athletic Volunteers (CAV).
Pinaagi sa padayon nga ensayo ug pag-apil sa nagkadaiyang kompetisyon, nakadaog na sila og daghang kampiyonato ug nagpadayon sa pagdala og dungog sa Cebu ug sa Pilipinas.
Sa umaabot nga torneyo nga ipahigayon sa Hulyo 10 hangtod 12, 2026 sa Xinzhuang Gymnasium sa New Taipei City, makigsangka ang Pilipinas batok sa mga lig-ong koponan gikan sa Chinese Taipei, Singapore, Hong Kong, Macau, Korea, Thailand, Malaysia, India, China, ug Iraq aron makigbisog alang sa titulo sa Asia Pacific.
Gidapit usab sa team ang mga batan-ong atleta nga sulayan ang Tchoukball ug gihangyo ang komunidad nga padayon silang suportahan pinaagi sa pagdasig, pagtan-aw sa ilang mga dula, ug pagtabang sa ilang kampanya aron mas mapalambo pa ang maong sport sa Cebu ug sa tibuok nasud.
I via Renante Socia Lada ug Ting Joe Pepito
Renante Socia Lada
Congratulations 💕💕💕