Paspas nga aksyon sa mga pulis sa Police Station 11 sa Cebu City Police Office, miresulta sa pagkadakop sa usa ka suspek sa kaso nga robbery with force upon things sa Barangay Basak San Nicolas, Cebu City.
Matod sa report, nadakpan ang suspek kagahapon Mayo 25, 2026, mga alas 4:45 sa hapon, human kini nakit-an sa biktima ug dayon misingit og tabang sa mga pulis nga duol nga estasyon. Dihadiha mitubag ang mga otoridad ug nasikop ang suspek.
Base sa imbestigasyon, ang insidente nahitabo niadtong Mayo 24, 2026, mga alas 1:10 sa kadlawon. Ang suspek giingong adunay tuyo nga mangwarta ug pinugos gibuak ang kandado sa usa ka water vendo machine nga nagkantidad og ₱9,500.
Gikuha usab sa suspek ang sulod nga halin sa makina nga moabot og mga ₱3,000 nga tinigum sulod sa tulo ka semana. Tungod niini, ang total nga kadaot ug nawala miabot og ₱12,500.
Human madakpi, gidala ang suspek sa Police Station 11 ug karon anaa na sa kustodiya sa kapulisan samtang giandam ang tukmang kaso batok kaniya.
Giila sa kapulisan nga ang dali nga koordinasyon tali sa biktima ug pulis dako og natabang sa paspas nga pagdakop sa suspek, nga nagpakita sa kamahinungdanon sa kooperasyon sa komunidad ug kapulisan sa pagbatok sa krimen.
I via Renante Socia Lada