Gihatagan og dakong pasalamat sa Korte Suprema ang Cebu City Police Office (CCPO) tungod sa ilang lig-on nga suporta ug seguridad atol sa 2025 Bar Examinations nga gipahigayon sa University of San JoseāRecoletos (USJ-R) Basak Campus.
Gipangulohan ni Mr. Gil F. Pastorfide, Security Head sa Local Testing Center (LTC), personal niyang gipaabot ang pagpasalamat sa mga kapulisan sa usa ka courtesy visit sa buhatan ni Acting City Director Police Colonel Enrico Evangelista Figueroa niadtong Setyembre 15, 2025.
Matod ni Pastorfide, ang pasalig, disiplina ug kooperasyon nga gipakita sa CCPO maoy nakaamot sa kalampusan ug hapsay nga pagdumala sa Bar Exams nga gipahigayon niadtong Setyembre 7, 10 ug 14, 2025. Tungod niini, nakab-ot ang usa ka malinawon ug walay samok nga pagtakda sa eksaminasyon.
Gipresentar usab ni Pastorfide ang Certificate of Attendance ngadto kang PCOL Figueroa isip pag-ila sa iyang liderato sa pagplano ug pagpatuman sa seguridad alang sa kaluwasan sa mga examinees ug sa publiko nga mitambong.
Pinaagi sa paningkamot sa CCPO, gipamatud-an usab ang ilang padayon nga katungdanan sa pag-alagad ug pagpanalipod sa katawhan, ilabi na sa mga dakong kalihokan sama sa Bar Examinations nga nagtimaan sa propesyonal nga dalan sa umaabot nga mga abogado sa nasud.
Source: CCPO
I via Renante Socia Lada