Mainitong giabiabi sa mga opisyal sa Sugbo si His Majesty Sultan Haji Hassanal Bolkiah uban ni His Royal Highness Prince Abdul Mateen sa ilang pag-abot sa Mactan-Cebu International Airport kagahapon Miyerkules sa gabii, Mayo 6, alang sa 48th ASEAN Summit ug related meetings.
Ang delegasyon sa Brunei Darussalam gisugat ni Cebu Governor Pamela Baricuatro uban ni Lapu-Lapu City Mayor Cindi King-Chan, Department of Social Welfare and Development Secretary Rex Gatchalian, Brunei Ambassador Megawati Manan, ug ABC President ug Basak Barangay Captain Jasmine Marie Chan-Olmstead.
Ang pag-abot sa Sultan sa Brunei kabahin sa pag-apil sa mga lider sa Southeast Asian nations alang sa importanteng summit nga gihost karon sa Cebu.
Gilauman nga hisgutan sa maong summit ang mga isyu bahin sa ekonomiya, seguridad, digital trade, maritime cooperation ug uban pang mga programa nga makatabang sa pagpalig-on sa panaghiusa sa mga nasud sakop sa ASEAN.
Padayon usab ang hugot nga seguridad ug preparasyon sa Cebu aron masiguro ang hapsay ug malinawon nga pagdumala sa international nga kalihokan.
Source: Cebu Province PIO
I via Renante Socia Lada