Posibleng mahimong usa sa mga venue sa mga ministerial ug senior officials meeting sa Association of Southeast Asian Nations (ASEAN) Summit ang dakbayan sa Sugbo sa 2026, sumala sa mga opisyal nga mibisita sa siyudad niadtong Marso 31, 2025.
Si Cebu City Mayor Raymond Alvin Garcia kauban ang delegasyon gikan sa Department of Foreign Affairs (DFA) nga gipangulohan ni Ambassador Celia Anna M. Feria, director general for operations ug assistant secretary for cultural diplomacy, nagbuhat og site inspection sa mga posibleng lokasyon alang sa mga ASEAN Summit meetings.
Kauban ni Ambassador Feria sa delegasyon si Ret. Maj/Gen Potenciano C. Camba, technical assistant head for operations; Reginald Bernabe, technical assistant head of conference management; Maria Angela Navato-Javier, technical assistant head for tourism management services; ug Cecyrill Lorenzo, head of hospitality management services.
Ang ASEAN Summit 2026 gibanabana nga muabot ngadto sa 1,500 ka mga delegado gikan sa mga nasud sa Indonesia, Malaysia, Singapore, Thailand, Brunei, Vietnam, Laos PDR, Myanmar, Cambodia, ug Timor Leste, ug mga observer countries. Ang mga delegado mobisita usab sa Mactan Cebu International Airport ug Bohol alang sa dugang inspeksyon sa mga pwedeng venue.
Ang Cebu, nga usa sa mga leading tourist destinations sa Pilipinas, adunay dakong kahigayunan nga mapakita ang kultura ug mga atraksiyon sa ASEAN region pinaagi sa maong kalihokan. Ang ASEAN Summit 2026 maghatag ug dakong oportunidad alang sa lokal nga ekonomiya ug industriya sa turismo.
Source: Cebu City PIO
I via Renante Socia Lada