Sa usa ka paspas nga operasyon, nadakpan dayon ang mga suspetsado sa nahitabong pagpamusil sa Tabogon, Sugbo sulod lamang sa usa ka adlaw, subay sa gibutyag sa Police Regional Office 7 (PRO7), niadtong Abril 1, 2025.
Matod sa PRO7, ang kalampusan sa maong operasyon nag-agad sa epektibong panag-uban tali sa Tabogon Municipal Police Station, Cebu Police Provincial Office (CPPO), Provincial Intelligence Unit, ug Mambaling Police Station sa Cebu City Police Office (CCPO).
Ang pag-ila sa mga suspetsado nahimong masayon tungod sa nakuha nga plaka sa ilang motorsiklo, nga gisusi ug gikompirma sa Land Transportation Office (LTO).
Usa ka testigo usab ang mitabang sa paghulagway sa maong motorsiklo, nga nakapahimo sa kapulisan sa pagsubay sa mga suspetsado gamit ang CCTV footage sa mga duol nga establisemento. Ang mga nadakpan nga pulos lumulupyo sa Sitio Ipil-ipil, Alaska, Mambaling, nag-edad og 21 ug 43-anyos.
Nakuha usab sa operasyon ang pipila ka ebidensiya sama sa usa ka motorsiklo, usa ka .45 caliber nga pistola, usa ka magasin nga may marka sa Chip McCormick Corp, walo ka buhing bala sa .45 caliber, usa ka sakyanan, duha ka handheld radios, usa ka pula nga helmet, ug usa ka pula nga gun case nga may marka nga “Tanfoglio.”
Sa pagkakaron, ang mga suspetsado anaa na sa kustodiya sa kapulisan ug mag atubang og tukmang kaso.
Gipasidunggan ni PBGen Redrico Maranan, Regional Director sa PRO7, ang panaghiusa sa Tabogon ug Mambaling police stations, PIU, ug CPPO. Gibutyag niya nga ang teknolohiya ug saktong imbestigasyon adunay dakong papel sa pagdakop sa mga kriminal. Gipadayag usab niya ang iyang pasalamat sa kooperasyon sa komunidad nga dako og natabang sa maong operasyon.
“The prompt actions undertaken by law enforcement underscore their dedication to delivering justice for the victims while simultaneously prioritizing the safety of the community, ” dugang ni PBGen Maranan.
Gipahibawo usab niya nga ang mga operatiba nga nalambigit sa maong operasyon hatagan og pasidungog sa usa ka seremonya sa flag-raising event karong Lunes.
Source: PRO7- PIO
I via Renante Socia Lada