Ang probinsya sa Cebu nagpabilin sa ilalom sa State of Calamity tungod sa epekto sa Bagyong Tino, sumala sa opisyal nga pahibalo sa Capitol PIO. Ang lakang naghatag og legal nga basehan sa mga aksyon sa provincial government aron maprotektahan ang katawhan gikan sa sobra nga kadaut sa kalamidad.
Sumala sa Section 3 sa Executive Order No. 68 nga gipagawas ni Governor Pam S. Baricuatro, ang price freeze sa basic goods ug prime commodities gisugdan aron malikayan ang sobra nga presyo ug pagsamok-samok sa supply. Kini naglakip sa bugas, mantika, asukar, karne, ug uban pang panginahanglan sa adlaw-adlaw.
Gipahimangnoan usab ang publiko nga dili tugutan ang overpricing ug hoarding, ug ang Provincial Government pinaagi sa Local Price Coordinating Council ug Department of Trade and Industry (DTI) nagpadayon sa pagbantay sa implementasyon niini aron masiguro nga protektado ang konsumidor.
Ang lakang nagpamatuod sa dedikasyon sa provincial government sa pagpanalipod sa katawhan sa panahon sa kalamidad, samtang gihimo ang tanan aron ang presyo sa mga panginahanglanon magpabiling patas ug accessible sa tanan nga apektado sa bagyo.
Source: Cebu Province PIO
I via Renante Socia Lada