Daling me aksyon ang kapulisan sa Police Station 6 sa Sawang Calero, Cebu City, diin usa ka biktima sa snatching ang natabangan ug nakuha usab ang gikawat nga iPhone 14 Pro Max.
Nahitabo kini niadtong miaging mga adlaw diin ang biktima nag-order og pagkaon sa usa ka food shop sa Barangay Calamba, Cebu City. Niadtong higayona, duha ka lalaki nga sakay og e-bike ang kalit nga miagi ug milabhni sa purple nga iPhone 14 Pro Max, dayon miikyas.
Dali ra nga nakapangayo og tabang ang biktima sa kapulisan ug nakahatag pa siya og impormasyon pinaagi sa iCloud tracking sa iyang cellphone. Tungod niini, paspas nga nakaresponde ang Police Station 6 ug gilusad ang follow-up operation.
Sa ilang operasyon, nasubay ang lokasyon sa cellphone ug usa sa mga suspek ang nadakpan sa Sitio Lawis, Barangay Pasil, Cebu City. Sa imbestigasyon, ang nadakpan nga suspek miingon nga naa pay kauban niini nga silingan niya.
Narekober usab sa kapulisan ang gikawat nga iPhone 14 Pro Max.
Karon, ang suspek anaa na sa kustodiya sa Police Station 6 ug naghulat sa kasong isapasa sa korte.
Gipakita niini nga hitabo ang paspas ug epektibong aksyon sa Cebu City Police Office sa pagpangita ug pagdakop sa mga kriminal ug pagpanalipod sa katawhan.
I via Renante Socia Lada