Nakadakop og 471 ka mga makalapas ang Police Regional Office 7 (PRO7) atol sa ilang gipakusog nga operasyon batok sa kriminalidad sa Central Visayas gikan Mayo 10 hangtod 16, 2026. Lakip sa ilang nakumpiskar mao ang kapin ₱10.6-milyon kantidad sa gidudahang shabu.
Sa kampanya batok sa ilegal nga drogas, 214 ka mga indibidwal ang nadakpan sa nagkalain-laing operasyon sa rehiyon. Nakuha usab sa kapulisan ang 1,565.91 gramos nga shabu nga adunay balor nga ₱10,648,188.00 sumala sa standard drug price.
Padayon usab ang manhunt operation sa PRO7 diin 109 ka wanted persons ang nasikop. Ning panahuna, 20 ang Most Wanted Persons samtang 89 ang Other Wanted Persons nga adunay mga warrant of arrest sa lain-laing krimen.
Sa kampanya batok sa loose firearms, 26 ka mga tawo ang nadakpan ug 53 ka armas, usa ka explosive device, ug 100 ka mga bala ang nasakmit ug nabawi sa kapulisan. Dugang pa, upat ka armas ang boluntaryong gitugyan pinaagi sa implementasyon sa
OPLAN Katok, usa ka programa sa pulis nga nag-awhag sa mga tag-iya sa armas nga walay sakto nga dokumento nga motugyan o magparehistro pag-usab sa ilang armas.
Samtang sa kampanya batok sa ilegal nga sugal, 122 ka mga tawo ang nadakpan ug nakumpiska ang ₱20,442 nga pusta. Ang illegal number games maoy adunay pinakadaghang nadakpan nga miabot sa 47 ka tawo.
Gidayeg ni PRO7 Acting Regional Director PBGen Arnold E. Abad ang mga operatiba ug kapulisan tungod sa ilang padayon nga paningkamot sa pagsumpo sa kriminalidad sa rehiyon.
Matud pa ni Abad, kinahanglan nga ipadayon ug palig-onon pa ang mga operasyon aron masiguro ang kaluwasan sa komunidad ug mas mapalig-on ang pagsalig sa publiko sa kapulisan. Nagmando usab siya sa tanang police units sa Central Visayas nga suportahan ang Safer Cities initiative sa Department of the Interior and Local Government aron mapalambo ang kalinaw ug seguridad sa nasud.
I via Renante Socia Lada