Kagahapong adlawa, Agusto 11, 224, gisaulog ang “International Youth Day 2024” sa Plaza Independencia, didto sa dakbayan sa Sugbo.
Didto si Acting Mayor Raymond Alvin Garcia, nga nipadayag sa iyang kalipay nga daghang mga kabatan-onan ang nigahin gyud og panahon aron mosalmot niini.
“Thank you very much for coming here. Nagpakabana gyud mo sa atong International Youth Day to show the people nga kitang tanan, we give importance to our young, we give importance to our youth. And we all know that the hope of tomorrow is in the hands of our young people,” pulong niya.
Sa maong kalihokan, nga gipaisugdahan ni Sangguniang Kabataan (SK) Federation (SKF)-Cebu City President ug ex-officio City Councilor Rhea Mae Jakosalem, adunay tema nga “From Clicks to Progress: Youth Digital Pathways for Sustainable Development”.
Sa iyang bahin, nipadayag sab sa iyang pagpaluyo sa kalihokan si Acting Vice Mayor Dondon Hontiveros.
“On behalf of the (city) councilors, dali ra jud kaayo mi mosuporta sa unsang mga resolution ipasar ni Councilor Rhea Jakosalem, kay tungod nga niagi ni siya og deliberation and makita ang participation nga ing-ani dali ra gyud kaayo pag-approve,” pulong ni Hontiveros, nga maoy presiding officer sa Konseho sa Dakbayan.
“So, again, dili ni nila mabuhat kung wala ang ilang participation ug pag-cooperate. Kaninyong tanan salamat gyud kaayo,” dugang niya.
Matod ni Renella Jade Toring, ang SK chairperson sa Brgy. San Nicolas Proper ug SKF public relations officer, aduna silay ipahigayon nga nagkalainlaing mga kalihokan karong semanaha alang sa pagsaulog International Youth Day.
Naglakip ang maong mga kalihokan sa SK Semi-annual Recognition, Clash of Talents, Youth Services Caravan nga ipagihayon sa Fuente Osmeña Rotunda, KK Summit, ug uban pa. (Renante Socia Lada)
(Source: Cebu City PIO)