Gidayeg ang Mandaue City isip modelo sa kampanya batok iligal nga drogas atol sa benchmarking visit sa Quezon City Anti-Drug Abuse Advisory Council (QCADAAC) karong adlawa. Ang ilang pagbisita nagtumong sa pagtuon sa epektibong lokal nga mga pamaagi sa pagpakigbatok sa drogas.
Gipangulohan ni QCADAAC Action Officer Christine Pascua ang grupo, nga mainitong giabi-abi sa Mandaue City Substance Abuse and Mental Health Services Office (SAMSHO) ilawom sa liderato ni Atty. Ebenezer Daryl Manzano. Kauban usab sa pagpangdawat nila ang mga opisyal sa dakbayan nga sila Konsehal Ting Sol Cabahug Jr., Konsehal Eugene Andaya, Former Vice Mayor Nerissa Soon-Ruiz, Konsehal Raul Kevin Cabahug, Konsehal Atty. Joel Seno, ug Konsehal Andreo “Anjong” Ouano-Icalina.
Sa mensahe ni Mayor Thadeo “Jonkie” Ouano nga gibasa ni Atty. Riczen Gingoyon, Executive Secretary sa Mayor’s Office, gipasiugda ang panaghiusa ug inobasyon isip yawe sa pagkab-ot sa usa ka drug-free nga komunidad.
“Your visit reflects our shared commitment to building drug-free, safer communities — a goal that demands unity, compassion, and continuous innovation.”
Gipresentar sa Mandaue ang ilang mga programa nga base sa komunidad sama sa prevention, rehabilitation, ug reintegration nga gipatuman pinaagi sa aktibo nga Barangay Anti-Drug Abuse Councils (BADACs). Gipaambit usab nila nga 22 sa 27 ka barangay sa dakbayan ang opisyal nga gi-deklar nga drug-cleared base sa Dangerous Drugs Board (DDB) standards.
Ang maong pagbisita sa QCADAAC usa ka dakong pasidungog ug pruweba sa kasaligan ug kaseryoso sa Mandaue City sa kampanya kontra drogas, ilabina ilawom sa malinawon ug malungtarong liderato ni Mayor Jonkie Ouano.
Source: Mandaue City PIO
I via Renante Socia Lada