Human sa kapin 13 ka tuig nga paghulat ug pagka-atrasado, andam na ang Cebu Bus Rapid Transit (BRT) project nga magsugod sa test run karong Setyembre 2025, sumala sa Department of Transportation (DOTr) ug mga lokal nga opisyal atol sa press conference karong Miyerkules, Hulyo 23, 2025.
Gipadayag ni Transportation Secretary Vince Dizon nga dakong kalampusan kini para sa mga pasahero nga dugay nang nagpaabot sa moderno ug kombinyenteng sistema sa transportasyon.
Ang Phase 1 sa BRT magsugod gikan sa Cebu South Bus Terminal paingon sa Cebu Provincial Capitol, nga may koneksyon usab paingon sa Plaza Independencia. 95% na ang nahuman sa konstruksyon, ug ang nahabilin nalang kay mga gamay nga butang sama sa pagpamutang sa waiting sheds, basurahan, ug bike lanes.
Gipasabot ni Dizon nga ang Capitol Station dili pa mag-operate panahon sa trial run tungod sa kulang nga dokumento, apan tulo ka estasyon ang magamit sa test run.
Gibutyag usab ni Mayor Nestor Archival ang iyang kabalaka sa kahimtang sa mga kasamtangang bus operators. Gitubag kini sa DOTr nga walay operator nga mapapahawa, kay ipasulod ra sila sa bag-ong sistema. Magplano og pormal nga kasabotan ang DOTr ug city government aron masulbad ang ubang isyu.
Giduso ni Vice Mayor Tomas Osmeña nga magpaandar og temporaryong ruta gikan sa Kapitol paingon sa Colon samtang nagpaabot sa full operation. Gisugtan kini ni Dizon ug gitinguhang masugdan sulod sa usa ka buwan.
Pang operational na gyud ang tibuok sistema, gamiton ang Public-Private Partnership (PPP) model. Ang Seabus ang magdumala sa temporaryong operasyon, apan ang full system i-auction sa publiko. Ang gobyerno ang magdumala sa koleksyon sa plete aron angay ang presyo.
Gilauman nga ang Phase 2A ug Phase 3 sa BRT mahuman sa 2027 o sayo sa 2028, uban sa laing kontraktor ug dugang nga mga ruta.
Source: Cebu City PIO
I via Renante Socia Lada