Sa sulod lamang sa lima ka semana, ang Police Regional Office 7 (PRO7) mihimo og 268 ka operasyon batok sa iligal nga armas, nga misangpot sa pagkakumpiskar sa 268 ka pusil nga walay rehistro ug pagdakop sa 142 ka mga indibidwal sa tibuok Central Visayas.
Gipahigayon ang mga operasyon gikan Hunyo 13 hangtod Hulyo 17, 2025, nga naglakip sa 183 ka police response operations, 46 ka pagserbisyo og search warrant, 38 ka buy-bust operations, ug usa ka warrant of arrest service. Kadaghanan sa mga armas narekober pinaagi sa intelihente nga pagpahigayon sa search warrant ug police response. Nakarekober usab ang PRO7 og 14 ka eksplosibo sa parehas nga yugto.
Sumala sa Republic Act No. 10591 o ang Comprehensive Firearms and Ammunition Regulation Act, ang iligal nga armas mao ang mga pusil nga walay rehistro, iligal nga gihuptan, o wala’y klarong dokumento. Lakip niini ang smuggled, homemade, o gi-modify nga mga pusil, ingon man ang mga armas nga expired na ang rehistro.
Usab, sa ilawom sa Revitalized Katok Program, 19 ka pusil ang boluntaryong gisurender sa mga tag-iya, diin 18 niini gi-turn over pinaagi sa community-based dialogues ug outreach efforts. Ang Katok Program usa ka door-to-door nga inisyatiba nga nag-awhag sa mga tawo nga iparenew ang ilang mga lisensya o isurender ang mga pusil nga walay rehistro alang sa kaluwasan sa komunidad.
Gihangyo usab ni PBGen Maranan ang publiko nga motaho dayon sa mga otoridad kung aduna silay makita nga tawo nga nagdala og pusil nga walay klarong otorisasyon o pinasikop sa kahasol.
Source: PRO7
I via Renante Socia Lada