Nasayran gikan sa Mandaue City Fire Office nga ang senior citizen nga napaso atol sa sunog sa Barangay Looc, Dakbayan sa Mandaue nitaliwan na.
Si Norma Fomoyaso, 62 anyos, nga nakaangkon og first-degree burns sa nahitabong sunog.
Matod ni FO1 Neil Ian P. Amancio, imbestigador sa Mandaue City Fire Office, namatay si Fomoyaso kagahapong adlawa, Enero 25, 2025, sa oras nga alas 2:30 sa kaadlawon. Base sa impormasyon nga nakalap sa MCFO, ang hinungdan sa iyang kamatayon mao ang pag-atake sa kasing-kasing, nga posibleng resulta sa trauma ug stress gikan sa insidente.
Ang sunog nga nahitabo nakaapekto sa daghang residente sa maong mga barangay ug nagbilin og kadaot sa mga kabalayan. Padayon gihapon ang imbestigasyon sa MCFO aron matino ang hinungdan sa sunog.
Ang lokal nga kagamhanan usab padayon nga nitabang sa mga biktima aron sila makabangin sa maong trahedya. (Renante Socia Lada)