Nakalas ang usa ka 78-anyos nga lalaki human gitigbas sa iyang kainom samtang nagtan-aw sila sa boxing match tali ni Manny Pacquiao ug Mario Barrios niadtong Domingo, Hulyo 20, 2025, sa Barangay Cansiwang, Guindulman.
Ang biktima giila nga si Angelo Gesalta Omapas, samtang ang suspetsado mao si Samuel Amoncio Balaba, 68-anyos, nga silingan ra usab sa biktima.
Sumala sa imbestigasyon sa kapulisan, kalit lang nitumaw ang panaglalis sa taliwala sa ilang tan-aw sa live telecast sa maong boxing. Sa kalagot, gikuha ni Balaba ang iyang dalang sundang ug manigbas sa nagkadaiyang parte sa lawas ni Omapas.
Tungod sa grabeng samad, wala na kini mabuhi pa bisan pa sa paningkamot sa mga silingan nga tabangan siya. Ang sanggot nga gigamit sa pagpanigbas gikataho nga walay bawot, nga maoy hinungdan sa grabe nga kadaot sa lawas sa biktima.
Gipasabot sa kapulisan nga dugay nang may personal nga aligutgot ang duha ka suspek ug biktima, apan padayon pa ang ilang imbestigasyon aron masayran kun ang panaglalis ba may kalabotan sa duwa ni Pacquiao ug Barrios o resulta lamang sa daang bangi.
Gidakop si Balaba ug nasayran nga andam na kini pasakaan og kaso nga murder atol sa kasamtangang proseso sa imbestigasyon.
I via Renante Socia Lada