Usa ka staff sa resort ang namatay human niuwang sa gubot sa magtiayon nga guest sa nakalabay na gabii. Ang biktima giila nga si Edgardo Pasco, 55 anyos, lumad nga taga Bacolod City ug empleyado sa Edwards Place Resort nga nahimutang sa Barangay Daanglungsod, Alcoy, Cebu.
Sumala sa imbestigasyon sa Alcoy Police, si Pasco misulay og uwang sa gubot tali sa magtiayong Philip Michael Malba, 39, ug sa iyang asawa nga si Johanna, 40. Apan imbis maulian ang tensyon, gipatiran hinoon siya ni Malba nga maoy hinungdan sa iyang pagkahulog sa hagdan ug pagkabanga sa iyang ulo sa semento.
Tungod sa grabeng samad sa ulo, dali siyang gidala sa ospital apan gideklarar kini nga dead on arrival. Nakompirmar sa doktor nga ang hinungdan sa iyang kamatayon mao ang head injury nga iyang nakuha human sa pagkapukan.
Ang kagubot nagsugod kuno human nagselos ang asawa ni Malba sa ilang panag-uban, hinungdan nga naglalis ang duha. Didto misulod si Pasco aron mubulag ug mupakalma sa duha apan napasakitan hinoon siya.
Gidakop dayon sa kapulisan si Philip Michael Malba ug giandam na ang pagsaka og kasong homicide batok kaniya. Sa pagkakaron, nagpadayon ang imbestigasyon sa kapulisan samtang gihatagan og hustisya ang kamatayon ni Pasco.
I via Renante Socia Lada