Usa ka gi-report nga armadong lalaki ang na-neutralize human nakigpinusilay sa kapulisan sa Sitio Tabay, Barangay Tayud, Liloan, Cebu niadtong alas 8:50 sa gabii, Hulyo 21, 2025. Ang suspek giila nga si Sammy Taborada, usa ka iladong drug personality nga lumulupyo sa maong lugar.
Sumala sa Liloan Municipal Police Station, nadawat nila ang impormasyon gikan sa Barangay Intelligence Network (BIN) bahin sa presensya sa usa ka armado nga lalaki. Dali silang miresponde uban ang ilang intelligence operatives ug BIN asset nga gisul-ob og bulletproof vest. Ang BIN asset maoy nagtudlo sa eksaktong nahimutangan sa suspek.
Pag-abot sa lugar, gisulayan unta nila og pakig-istorya si Taborada apan kalit kini namusil gamit ang usa ka automatic firearm nga giilang usa ka KG-9 9mm. Naigo sa walang kamot ang usa ka BIN operative, apan naka-panagang ang vest nga iyang gisul-ob. Nibawos og pusil ang kapulisan ug nakit-an nga na-neutralize ang suspek.
Human sa insidente, gitawagan dayon sa kapulisan ang Municipal Disaster Risk Reduction and Management Office (MDRRMO) aron mahatod ang suspek sa Eversley Childs Sanitarium Hospital.
Sa crime scene, nakakuha ang mga otoridad og usa ka .45 caliber pistol ug usa ka KG-9 9mm automatic firearm nga gituohang gigamit ni Taborada. Ang mga armas ipailawom sa ballistic examination samtang padayon ang imbestigasyon sa maong insidente.
I via Renante Socia Lada