Gianunsyo na ang libreng medical mission nga gipasiugdahan ni Senador Raffy Tulfo nga ipahigayon sa tulo ka dagkong siyudad sa Sugbo—Mandaue, Talisay, ug Carcar—gikan Disyembre 9 hangtod 13, 2025. Tumong sa maong kalihokan ang paghatod og duol ug libre nga serbisyo medikal alang sa mga residente, ilabi na kadtong gikan sa mga kabus ug apektadong pamilya nga nagkinahanglan og medikal nga tabang.
Matag adlaw, ang medical mission magsugod sa alas 8:00 sa buntag ug molungtad hangtod alas 5:00 sa hapon. Lakip sa mga serbisyo nga ipatuman mao ang libre nga konsultasyon sa doktor, X-ray, blood test, blood sugar testing, ECG, urinalysis, ug paghatag og libreng tambal depende sa assessment sa medical team. Gilauman nga daghan ang makapahimulos sa maong serbisyo.
Gipahibalo usab ang opisyal nga eskedyul sa paglibot sa medical mission: Disyembre 9 sa Mandaue City Sports Complex pinaagi sa suporta ni Mayor Jonkie Ouano; Disyembre 10 sa San Pio Village, Dumlog, Talisay City; Disyembre 11 sa Talisay City Hall Sports Academy uban sa pasalamat ni Mayor Samsam Gullas; ug Disyembre 12–13 sa Poblacion 3, Carcar City pinaagi sa suporta ni Mayor Patrick Barcenas.
Giawhag sa mga lokal nga panggamhanan nga ipaabot ug ipahibalo kini sa ilang tagsa-tagsa ka komunidad aron masiguro nga taas ang participation rate ug maabot ang inadlaw nga target nga dili mominus sa 400 ka pasyente matag lugar. Importante kini aron mahatagan og tukmang serbisyo ang kadaghanan sa mga residente.
Pinaagi sa medical mission, gipadayon ni Senador Tulfo ang iyang paningkamot nga mapagaan ang pinansyal nga palas-anon sa mga katawhan kon magkinahanglan sila og medikal nga pag-atiman. Tumong niini ang pagsiguro nga ang mahinungdanong serbisyo medikal magpabiling accessible ug libre alang sa tanan, labi na sa mga pamilya nga walay kapasidad sa pagbayad sa medikal nga gasto.
I via Renante Socia Lada