Misinggit sa kalipay ang kadaghanan sulod sa Cebu Coliseum human gianunsyo ni Governor Pamela Baricuatro ang cash incentive alang sa mga Barangay Health Workers (BHWs) sa 2025 Cebu Province BHW Summit niadtong Disyembre 5. Kapin 9,000 ka BHWs gikan sa lain-laing barangay sa lalawigan ang mitambong sa maong kalihokan, nga gipahinungod sa pag-ila sa ilang kanunay nga serbisyo alang sa panglawas sa komunidad.
Gipahibalo ni Gov. Baricuatro nga ang 100 ka retirado nga BHWs makadawat og ₱10,000 matag usa, samtang ang mga aktibong BHWs makakuha og ₱7,000, apil na ang bag-ong uniporme ug noche buena packs.
Ang summit, nga gipahigayon isip pagsaulog sa BHW Day, mipasiugda sa dakong papel sa mga BHW isip unang motubag ug pinaka-accessible nga health workers sa mga barangay. Sila ang motabang sa paglikay sa sakit, pag-atiman sa inahan ug bata, ug pagpatuman sa mga programa sa panglawas sa komunidad.
Gamit usab ang kalihokan aron mapalig-on ang suporta sa BHWs—lakip ang mas maayong kondisyon sa trabaho, dugang benepisyo, ug mas lig-on nga suporta gikan sa probinsya.
Sa iyang mensahe, gipasalamatan ni Governor Baricuatro ang pagkugi ug kadasig sa mga BHW, labi na human sa linog ug mga bagyong Tino, Uwan, ug Verbena. Giingon niyang ang mga BHW mao ang kusog ug lig-on nga sandigan sa panglawas sa matag komunidad.
“Dili mo assistant. Dili mo extra. Kauban mo namo isip kaabag sa pagtukod og mas himsog nga Sugbo,” matod ni Gov. Baricustro “Kamo ang kusog sa pagbangon sa Sugbo ug ang paglaum sa mas maayong kaugmaon,” dugang pa niya.
Mitambong usab sa kalihokan si Provincial Board Member Stanley Caminero ug Capitol Piso Health Consultant Dr. Elisse Nicole Catalan. Gisugdan ang adlaw pinaagi sa Zumba ug giapsan sa Miss BHW competition, nga nakadugang kasadya sa panagtigom.
Source: Cebu Province PIO
I via Renante Socia Lada