Mikunhod ang gidaghanon sa krimen sa Central Visayas human matala sa Police Regional Office 7 (PRO7) ang dakong pagkunhod sa walo ka focus crimes gikan Enero hangtod Nobyembre 2025. Sumala sa rekord, miubos kini og duol 30 porsyento o katumbas sa 874 ka kaso nga minus kung itandi sa sama nga bulan niadtong miaging tuig.
Apil sa walo ka focus crimes ang murder, homicide, physical injury, rape, robbery, theft, ug carnapping sa both motor vehicle ug motorcycle, mga krimen nga suod kaayong gimonitor tungod sa direkta nilang epekto sa kahapsay ug kalinaw sa komunidad.
Pinakataas ang porsyento sa pagkunhod sa carnapping sa motor vehicle nga miabot og 57.14 porsyento, gisundan sa robbery nga miubos og 41.18 porsyento, ug carnapping sa motorcycle nga mikunhod og 34.88 porsyento. Kini nagpakita sa mas gihugtan nga operasyon ug estratehiko nga pagpatuman sa balaod sa PRO7 sa tibuok rehiyon.
Gidayeg ni Regional Director PBGEN Redrico A. Maranan ang kanunay nga paningkamot sa mga kapulisan sa PRO7 ug giila nga ang maong kadaugan resulta sa ilang pagpakita kanunay sa karsada, kusog nga operasyon, ug tinud-anay nga pagserbisyo. Nagpasalamat usab siya sa komunidad sa padayon nga pagsalig, kooperasyon, ug paghatag og mahinungdanong impormasyon.
“This remarkable decline in crime is a testament to the hard work and commitment of our personnel, matched by the steadfast support of our communities. Together, we are creating a safer and more secure Central Visayas,” segon ni PBGEN Maranan.
Nagpabilin nga determinado ang PRO7 sa pagpadayon sa maong kalamboan ug sa pagpalig-on pa sa pakig-alayon sa lokal nga kagamhanan, stakeholders, ug katawhan aron maminusan pa ang kriminilidad ug mapadayon ang kalinaw ug kahapsay sa rehiyon.
Source: PRO7 PIO
I via Renante Socia Lada