Nahulog sa kamot sa mga otoridad ang sakop sa Communist Terrorist Group (CTG), nadakpan kini didto sa Plaza Katawhan, Cebu Coastal Road, dakbayan sa Sugbo niadtong Disyembre 13, 2024, pasado alas-9:30 sa gabii.
Ang suspek giila nga si alyas “Ka Ar-Ar,” 30-anyos, nga taga Guihulngan City, Negros Oriental, ug adunay live-in partner.
Base sa report sa Criminal Investigation and Detection Group (CIDG) Cebu Field Unit, ang operasyon gihimo pinaagi sa koordinasyon sa 3012th Air Intelligence and Security Squadron, 301st Special Mission Group, 300th Air Intelligence and Security Wing sa Philippine Air Force, ug Brigade Group of BGEN Benito N. Ebuen Air Base.
Ang pagdakop gimugna gikan sa “actionable intelligence” nga nakumpirma ang presensya sa suspek sa maong lugar. Gihimo ang operasyon basi sa warrant of arrest nga giisyu ni Hon. Rosario S. Carriaga sa Regional Trial Court Branch 64 sa Guihulngan City alang sa kaso sa double murder nga walay pyansa.
Si Ka Ar-Ar giingong usa ka squad leader sa Sandatahang Unit Propaganda sa Central Negros 1, KR-CBNS, ug team leader sa SPARU unit nga naglihok sa Negros.
Ang maong operasyon usa ka dakong kalampusan alang sa kapulisan ug militar batok sa mga terorista nga pundok. (Renante Socia Lada)